बागलुङको बडिगाड गाउँपालिकाले खानेपानीको समस्या रहेको वडा नं. १० को दर्लिङमा ३९ लाख ७८ हजारको लागतमा खानेपानी आयोजना निर्माण गरिएको छ । नेपाल स्वास्थ्यका लागि पानीसँगको सहकार्य र स्थानीयको श्रमदानमा ४१ घरमा धारा जडान गरिएको हो ।
सो आयोजनाका लागि नेवाको २६ लाख ३१ हजार, स्थानीय उपभोक्ताको १० लाख ३८ हजार र गाउँपालिकाको ३ लाख आठ हजार व्यहोरिएको उपभोक्ता समितिका अध्यक्ष सन्तबहादुर रासकोटीले बताउनुभयो ।
उक्त आयोजनाले पात्ले झाँक्रीस्थानका ४२ घरधुरीमा शुद्ध खानेपानी पु¥याइएको छ । वर्षौ अघिदेखि स्थानीयवासीले खानेपानीको समस्या झेल्दै आएकामा अहिले प्रत्येक घरमा शुद्ध खानेपानी उपलब्ध गराइएको छ । सो आयोजनाका लागि स्थानीयले श्रमदानसमेत गरेका नेवाका गण्डकी प्रदेश प्रबन्धक कुमार सिलवालले बताउनुभयो ।
‘खानेपानीको समस्याले गर्दा किसानले तरकारीसमेत लगाउन नपाएका र गाईबस्तुलाई खोलाछेउमा लगेर पाल्नु परेको थियो’ अध्यक्ष रासकोटीले भन्नुभयो, ‘अहिले पानीले धेरै सजिलो बनायो ।’ पाइपलाइनबाट पानी नपुगेका सात घरका लागि सोलार प्यानल जडान गरेर लिफ्ट प्रविधिमार्फत पानी खुवाउने योजना रहेको उहाँको भनाई थियो ।
दर्लिङकै बलगाँसमा पनि गत साउनमा अर्को खानेपानी आयोजना निर्माण गरिएको थियो । २२ लाख ३९ हजारको लागतमा निर्माण गरिएको सो आयोजनाबाट ५५ घरधुरीले स्वच्छ पानी खान पाएको उपभोक्ता समितिका सदस्य बिजय केसीले बताउनुभयो ।