एसईई परीक्षाको नतिजा बुधबार सार्वजनिक हुने

-- धौलागिरी एफएम संवाददाता / प्रकाशित मिति : बुधबार, असार ११, २०७६

यस वर्षको एसईई परीक्षाको नतिजा बुधबार सार्वजनिक हुने भएको छ ।
राष्ट्रिय परीक्षा बोर्ड, परीक्षा नियन्त्रण कार्यालय भक्तपुरका अनुसार यस वर्षको एसईई परीक्षा नतिजा प्रकाशनको अन्तिम तयारी सकिएकाले भोलि नै नजिता सार्वजनिक गर्ने तयारी गरिएको हो ।
‘हामीले सबै तयारी सकेका छौं, भोलि नै या केही समस्या परेको खण्डमा पर्सिसम्ममा नतिजा सार्वजनिक भइसक्छ,’ पनिकाका एक अधिकारीले जानकारी दिनुभयो ।
एसईईको नजिता यसपटक परीक्षा बोर्डको वेबसाइटका अतिरिक्त विभिन्न १९ वटा सर्टकोड र वेबसाइटबाट हेर्न सकिनेछ ।
बोर्डका अनुसार एसईईको नतिजा हेर्न मोबाइल फोनबाट सिम्बोल नम्बर टाइप गरेर एसएमएस गर्दा आउने व्यवस्था मिलाइएको छ । यसका लागि ३१००३, ३१००७, ३४९४९, ३५००१ र १६०० मा एसएमएस पठाउनुपर्नेछ ।
यसका अतिरिक्त शिक्षा मन्त्रालयको वेबसाइट, परीक्षा नियन्त्रण कार्यालय, अनलाइन खबर, इडीयू सञ्जाल, नेपाल टेलिकम, एनसेल र कान्तिपुर पब्लिकेसनको वेबसाइटबाट समेत नतिजा हेर्न सकिने व्यवस्था छ ।