‘कर्मचारी समायोजन अध्यादेश’को विरोधमा स्थानीय तहका कर्मचारी

-- Dhaulagiri Fm / प्रकाशित मिति : सोमवार, पुस २, २०७५

बागलुङ जिल्लामा कार्यरत स्थानीय तहका कर्मचारीहरुले ‘कर्मचारी समायोजन अध्यादेश’को विरोधमा आन्दोलनको कार्यक्रम घोषणा गरेका छन् ।

स्थानीय तहमा कार्यरत कर्मचारीहरु आवद्ध बागलुङ नगरपालिका कर्मचारी ट्रेड युनियनले आइतवार पत्रकार सम्मेलन गरि कर्मचारी समायोजन अध्यादेश विधेयकले आफूहरुलाई विभेद गरेको उल्लेख गर्दै त्यसको विरोधमा आन्दोलनको कार्यक्रम घोषणा गरिएको जनाएको छ ।

निजामती कर्मचारी र आफूहरुलाई दिने सेवा, सुविधामा नै विभेद भएपछि सो अध्यादेश विरुद्ध आन्दोलनमा जान बाध्य हुनु परेको नगरपालिका कर्मचारी एसोशियसनका केन्द्रिय उपाध्यक्ष युक्तप्रसाद सुवेदीले बताउनुभयो ।

संघले साविकको स्थानीय निकायमा कार्यरत श्रेणीविहिन कर्मचारीहरुको तह, सेवा र सुविधा तत्काल वृद्धि गर्न पनि सरकारलाई दवाव दिएको छ । आफ्ना मागहरुलाई अझै बेवास्ता गरिए सोमवारदेखी चरणवद्ध आन्दोलन गर्ने सघंले बताएको छ । जस अनुसार, सोमवार सांकेतिक बिरोध स्वरुप स्थानीय तहमा कामकाज बन्द गरि कार्यालयमै धर्नामा बस्ने, ३ गते विहान १० देखी १२ बजे सम्म धर्ना, ४ गते दिउसो २ बजे सम्म धर्ना, ५ गते सम्म दिउसो ३ बजे सम्म कामकाज ठप्प, ६ गते दिनभर कालोपट्टि बााधेर दिनभर कामकाज ठप्प गर्ने घोषणा गरेको छ । चरणवद्ध कार्यक्रमबाट पनि माग सम्वोधन नभए आन्दोलनलाई थप सशक्त पार्ने चेतावनी दिएको छ ।

उपाध्यक्ष सुवेदीले निजामति कर्मचारीहरुलाई अघि सारेर आफूहरुलाई विभेद नगर्न सरकारलाई पटक पटक आग्रह गरिए पनि बेवास्ता गरिएकाले आन्दोलनमा उत्रिनु पर्ने अवस्था आएको बताउनुभयो ।

सरकारले प्रदेश र स्थानीय तहको कर्मचारी समायोजनको नाममा निजामति कर्मचारीहरुलाई मात्रै प्रोत्साहन गर्ने काम गरेकोमा स्थानीय तहमा कार्यरत कर्मचारीहरुको आपत्ति छ । कार्यक्रमको सञ्चालन बागलुङ नगरपालिका कर्मचारी एशोसियसनका अध्यक्ष रुद्र केसीले गर्नुभएको थियो ।