जिल्लाको ढोरपाटन नगरपािलका ९ (ढोर) नविमा आज बिहान भिषण आगलागी भएको छ ।

आगलागीबाट ३० घर जलेको छ । रातको करिब दुई बजेतिर घरबाट सल्किएको आगोका आगो बिहान ८ बजेमात्रै नियन्त्रणमा लिइएको थियो ।

जलेका घरहरु नजिकै रहेको २३ घर भने जोगाउन सफल भएको नेपाली सेनाको हनुमान ध्वज गुल्मका गुल्मपति मेजर रविजंग खड्काले बताउनुभयो । ढोरपाटन सिकार आरक्षको सुरक्षार्थ उक्त क्षेत्रमा नेपाली सेनाको टोली बस्दै आएको छ ।

ढोरपाटनका बासिन्दा चैत्र देखि कार्तिक महिना सम्म उक्त स्थानमा बस्ने गरे पनी चिसो मौमसमा भने जाडो छल्न बोबाङ, अधिकारीचौर गाउँमा झर्ने गर्छन् । स्थानीयबासिन्दा जाडो छल्न बेसी झरेका कारण मानवीय क्षति भने नभएको मेजर खड्काले बताउनुभयो ।

दुई चार जना चौकिदारको भरमा घर सम्पत्ति जिम्मा लगाएर झरेका स्थानीयको घर सहित घरभित्र राखिएको लत्ताकपडा, अन्नपात सबै जलेर नष्ट भएको छ । ढोरपाटन प्रहरी चौकि समेत बोबाङ झरेका कारण बस्तिनै सुनसान रहेको अवस्थामा अचानक लागेको आगलागीले ठुलो रुप लिएको हो । आगो कसरी लाग्यो भन्ने खुल्न सकेको छैन । उक्त स्थानमा फलेकले छाएका फल्ले घर र ढुंगाले छाएका घरहरु छन् ।

घटना स्थल देखि करिब ३ किलोमिटर टाढा रहेको नेपाली सेनाको टोलीले आगलागीको जानकारी पाए लगत्तै गुल्मका गुल्मपति मेजर खड्काको कमाण्डमा खटिएको १ सय २३ जनाको टोलीले आगो नियन्त्रणमा लिन सफल भएको थियो ।